திங்களோடு தினமும் வாழ்த்துவேன்

 தன்னொளி பரப்பும் ஞாயிறு 
   திங்கள்உம்  முறையாய் வந்திட 

பொன்னோடு மிஞ்சும் செவ்வாய் 
   பூரிப்பு தன்னில் பூத்ததுவே 
இன்னருவி யாழன் இசைமீட்டிட
   இறையோடு வெள்ளி துதிபாடிட 
என்நேச னிடமிங்கு வந்திட்டேன் 
    எந்தை இறைவா போற்றி 

ஆசிபெறவே எந்தன் சிரமதை 
மாசில்லா மன்னவன் உம்மிடம் 
நெஞ்சுப்பங்  குனியுமுன் வீழ்ந்து 
கெஞ்சித் திரைகடல் போல்நின்றன் 
வஞ்சித்தவை  காசின்பமென் றலைய
அஞ்சிடும்  ஆனிரை கலங்கிநிற்க 
எஞ்சியது தன்னுள் ஆடியடங்க  
துஞ்சிய தொய்வுற்ஆ வணிகம் 
கிஞ்சித்தும் புரட்டா சிந்தனையும் 
கஞ்சிக்கும் தீராகொள்ஐப் பசியும்  
தக்கார்த் திகைப்பும் திரிபெனவும் 
ஊக்கார்  உறுமார்  கழிந்ததென 
எக்காலமும் உண்டோ இதுவென 
இக்காலம் வினவினேன் இறையை 

பேராசை விடல் (புதியக் குறள்)

மண்கொண்டு நிறையும் பாதாளம் நிறையாது 
எண்கொள்ளா பேராசை மனது 

அட்டைப்பூச்சி அருந்தும் குருதிபோல் உறிஞ்சும் 
வேட்டையார் அடுத்தவர் நலன் 

பேராசையெனும் கொடுந்தீ எரிக்கும் இல்லான் 
பேணும் ஒற்றைக் குடி(ல்)

இல்லாரை வாட்டும் பசியின் கொடுமை 
செல்வரைக் கொல்லும் சாபம் 

எழுதலை முறையினும் நீங்காப் பாவம் 
ஏழையை வஞ்சிக்கும் செயல் 

கள்வரினும் கேடு செல்வம் சேர்க்கயவர் 
கடுங்கோடை ஏழைக்கு அவர் 

தானம் தர்மமெனினும் பாவம் தீராது 
தன்தேவை மிஞ்சிய அவா 

கோயிற்சிலை கொடை கையூட்டு கொடுப்பர் 
கொடியவர் கொள்ளையில் கொண்டு 

அகடுக்கு ஊண்தேடும் ஏழையர் இருக்க 
பகட்டுக்கு சேர்ப்பவன் சவம்

 
செல்வம் கருத்துடை மாந்தர் எவ்வழியினும் 
செல்வர் மற்றவர் தீதுற 

அவாவெனும் தொற்று தன்னுடன் சேர்க்கும் 
அழுக்காறு அகந்தை என்றே

சா"தீய" வன்மம் ஒழி - புதியக் குறள்

மாந்தருள் சாதியைப் பேணும் கயவர் 
மதம்பிடிக் களிறினும் கேடு  

பொருள்:  மனிதர்களுள் சாதியை சாதி வேற்றுமையைக் 
கடைபிடிக்கும் கயவர்கள் மதம் பிடித்த யானையை விடக் 
அதிக கெடுதல் செய்வார்கள் 

சாதியின்கண் உயர்வு காணின் அஃது 
சீமைக்கரு வேலம் ஒப்ப 

பொருள்: ஒருவன் தனது சாதியைக் குறித்துக் கொள்ளும் 
பெருமை சீமைக்கருவேலம் மரம் போன்றது. அது அவன், 
அவனுடைய பொதுசமுதாயத்தின் நலன்களை கெடுத்து
நாசமாக்கிவிடும்  

பசும்பயிர் இழைந்து களையும் தேறும் 
பகுத்தறிவும் சாதிக் கண்டு 

பொருள்:  பசுமையான பயிர்களுடன் களையும் வளர்வது 
போல இங்கு பகுத்தறிவு பேசும் கூட்டத்திலும் சாதியம் 
வளர்ந்து வருகின்றது 

மதமெனும் மதுவினில் பிறந்த கொடுவிடம் 
மனிதருள் சாதியப் பிரிவு 

பொருள்:  மதம் என்னும் போதை தரும் கொடிய மது 
ஈன்றெடுத்த கொடிய விஷம் மனிதருள் காணப்படும் 
சாதியப் பாகுபாடுகள் 

உடல்நோகா கயவர் ஊதியம் கிட்ட 
உருகொண்ட சாதியப் பிணி 

பொருள்: உடல் வருத்தி உழைக்காத கயவர்கள் தங்கள் 
வருமானத்தை, செல்வதை சேர்க்க உருவாக்கியது தான் 
சாதிய பிரிவினைகள் மற்றும் சாதிய கொள்கைகள் என்ற 
கேடான தொற்று நோய் 

பிறப்பினால் மேல்கீழ் என்போர் மண்ணில் 
இறப்பினால் எரிநீறு கலந்து 

பொருள்: பிறப்பினால் ஒருவனை உயர்ந்தோர் 
தாழ்ந்தோர் என்பவர்கள் முடிவில் எரியூட்டப்பட்டு 
அவர்களது சாம்பல் எல்லோரோடும் மண்ணில்தான் 
கலக்கப்படும்  

சர்ப்பம்முன் நுணலின்  வாய்சிறு பூச்சியாய் 
சாதீய ஆதிக்கக் கேடு 

பொருள்: பாம்பின் வாயில் தவளை, அந்த தவளையின் 
வாயில் சிறிய பூச்சி என்று மனிதரில் சாதி அடிப்படையில் 
மனிதர்  தம்முடன் வாழ்பவர்களை அடிமைப்படுத்தி அவர்களின் 
உரிமைகளை சுரண்டும் கேடுகெட்ட மனப்பான்மை 
இந்த சாதிகளில் உண்டு 

பிறப்பால் ஒருவன் குணம் உயர்வெனில் 
பிணத்தால் பெருமை உண்டோ ?

பொருள்:  பிறப்பால் ஒருவனின் குணம் 
உயர்வு தாழ்வென்று இருக்குமானால் அப்படிப்பட்ட 
பெருமை பிணத்திற்கு சமமானது. மனிதன் தனிப்பட்ட 
மேன்மையை அடையாமல் சாதியின் பெயரால் 
பெருமை  அடைந்தால் அவன் ஒரு பிணமே 

கால்படும் கல்லை பணிவோன் தம்முள் 
கீழ்ப்படும் மனிதரை ஒடுக்க 

பொருள்:  தன் காலில் மிதிபட்ட கல்லை எடுத்து 
சிலைசெய்து அதை வணங்குகின்ற மனிதன் தனக்கு 
ஒப்பான பிற மனிதர்களை  சாதியை சொல்லி ஒடுக்கி 
அவர்களை இழிவுபடுத்துகிறான் 

கல்விசேர் செல்வம் உடைத்தும் சாதியர் 
கல்லில் ஆபரணம் அனைய.

சாதிவெறி கொண்ட மனிதர்கள் எவ்வளவுதான் 
படித்து, செல்வம் சேர்த்து பெருமை கொண்டாலும் 
அந்த கல்வி, செல்வம், பெருமை கல்லின் மீது 
சூட்டப்பட்ட அழகிய ஆபரணங்கள் போன்றதுதான்.