அன்புக் குழந்தைகளே! உங்கள் அனைவருக்கும் என் அன்பார்ந்த வாழ்த்துக்கள்.
"குழந்தை", ஆஹா, எவ்வளவு இனிமையான, மென்மையான ஒரு வார்த்தை. அதை சொல்லும் போதே மனம் குளிரும். என் மனதில் எப்போதுமே ஒரு ஏக்கம் உண்டு. "குழந்தையாகவே எப்போதும் இருந்து விடலாமே!". எனக்கு அவ்வளவு பிடிக்கும் குழந்தை பருவத்தை. ஒரு மனிதனுடைய வாழ்வில் அது ஒரு வசந்த காலம். பணக்காரக் குடும்பமோ, ஏழைக் குடும்பமோ, எந்த நிலையிலும் குழந்தைப் பருவம் அதனை உணராது ஏதோ ஒரு அற்புதமான மன நிலையில் ஆனந்தமாக அமைதியாக இருக்குமே, அதை விட இந்த உலகத்தில் மிகப் பெரிய மகிழ்ச்சி எதுவுமில்லை. தாயின் அணைப்பில், தந்தையின் பிணைப்பில் எந்தக் கவலையுமின்றி, ஆரவாரித்து கொண்டாடுவது, சகோதர, சகோதரியிடம் பேசி மகிழ்வது, தெருவில் உள்ள பிற குழந்தைகளிடம் ஓடியாடி விளையாடுவது எத்தனை மகிழ்ச்சி. ஏழ்மை நிலையிலும் இருப்பதைக் கொண்டு பகிர்ந்துண்டு வாழ்ந்த அந்த நாட்கள் வானத்தில் பறக்கும் நிலையை ஒத்தது. கள்ளம் கபடின்றி, சூதுவாது தெரியாது செய்த பிழைகள் கூட மனதில் நிற்பதில்லை. குழந்தைப் பருவம் மனிதனுக்குக் கொடுக்கப்பட்ட ஒரு அற்புத காலம். அதை மாசின்றி கவலையின்றி எவ்வளவு மகிழ்ச்சியாக வைத்திருக்க வேண்டுமோ, அத்தனை மகிழ்ச்சியில் வைத்திருங்கள். இந்தக் காலம், ஆண்டுகள் செல்ல செல்ல நம்மை விட்டு விலகும். எனவே, எவ்வளவு காலம் முடியுமோ அவ்வளவு காலம் குழந்தை மன நிலையிலே, இருக்க ஆசைப்படுங்கள். எல்லாவற்றிலுமே, இளம்பருவம் என்பது அழகானது, இரசிக்கக் கூடியது, கொஞ்சக்கூடியது. அது மனிதனோ, விலங்குகளோ, பறவைகளோ, செடிகளோ, அதன் இளமைத் தோற்றம், இனிமையிலும் இனிமை. இந்தப் பருவத்தில், உங்கள் பார்வையை கைபேசியின் மீதோ, வேறு மின்னணு பொழுது போக்கு சாதனங்கள் மீதோ விழ விடாதீர்கள். அதெற்கென்று உள்ள காலம் வரை அதனை விட்டு முடிந்தவரை விலகி இருங்கள். தாய், தந்தையிடம் கொஞ்சி விளையாடுங்கள், இருபது வயது வரை கூட). சகோதர, சகோதரிகளிடம் பேசி மகிழுங்கள். ஓடியாடி விளையாடுங்கள் (பெற்றோரின் கண் பார்வைக்குள்ளாக).. உங்களுக்கு பிடித்தமானதை எழுதுங்கள், ஓவியமாக வரையுங்கள், பேசுங்கள். உங்கள் மனதில் பட்ட ஏதாவது ஆராய்ச்சி சிந்தனையை, ஆபத்தில்லாத முயற்சியை செய்து பாருங்கள். பாடுங்கள், ஆடுங்கள். கவிதைகளை, கதைகளைத் தீட்டுங்கள். மற்றக் குழந்தைகளிடம் (மட்டுமே) உங்கள் கருத்துக்களை, கதைகளைப் பகிர்ந்து கொள்ளுங்கள். பிற குழந்தைகளுடன், முற்றத்திலோ அல்லது மொட்டை மாடியிலோ சேர்ந்து, பகிர்ந்து உண்ணுங்கள். உங்கள் குடும்பத்தில் நடக்கும் எந்த ஒரு சண்டை சச்சரவையும் உங்கள் கவனத்தில் கொள்ளாதீர்கள். நல்ல பயனுள்ள புத்தகத்தை நாள்தோறும் படியுங்கள். உங்கள் பெற்றோரிடம் அல்லது உடன் பிறப்புக்களிடம் காணும் தவறுகளை அன்பாகச் சுட்டிக் காட்டுங்கள். நீங்கள் தவறு செய்யும் போது, உங்கள் பெற்றோர் உங்களைக் கண்டிப்பதையும் தண்டிப்பதையும் மகிழ்ச்சியாய் ஏற்றுக் கொள்ளுங்கள். ஏனெனில், உங்கள் மீது உள்ள அக்கறையினால் தான், நீங்கள் வருங்காலத்தில் நன்றாக இருக்க வேண்டும் என்ற எண்ணத்தில் தான் உங்கள் பெற்றோர் உங்களிடம் கண்டிப்பு காட்டுகின்றனர் என்பதனை உணருங்கள். ஏழைப் பெற்றோரின் துன்ப நிலையை எப்போதும் கருத்தில் கொண்டு அவர்களுக்கு தொல்லை தராமல் மகிழ்ச்சியாக வாழுங்கள்.
"பிள்ளைகள், ஆண்டவர் அருளும் செல்வம்; மக்கட்பேறு, அவர் அளிக்கும் பரிசில்". (சங்கீதம் 127:3)
"பாலகரின் மழலையிலும் குழந்தைகளின் மொழியிலும் வலிமையை உறுதிப்படுத்தி உம் பகைவரை ஒடுக்கினீர்; எதிரியையும் பழிவாங்குவோரையும் அடக்கினீர்" (சங்கீதம் 8:2)
கருத்துகள் இல்லை:
கருத்துரையிடுக