நொறுங்கிய நெஞ்சமே! உன்னையும்
நேசிக்க ஒருவர் உண்டு
தேறுதல் தேடும் மனமே!
தேவன் உந்தன் அருகிலுண்டு
நேசிக்க ஒருவர் உண்டு
தேறுதல் தேடும் மனமே!
தேவன் உந்தன் அருகிலுண்டு
வாடும் இதயங்களே உங்கள்
வலியைப் போக்குவார் அவரே
தேடும் அமைதியை நாளும்
தேவன் தந்திடுவார் தயவாய்
உடைந்த உள்ளங்களே இறைவன்
உங்களை மிகுந்தே அறிவார்
படைத்த இறைவன் உம்மேல்
பரிவு காட்டா திருப்பாரோ?
பாரம்தாளா பெருஞ் சுமையால்
பரிதவிக்கும் மனங்களே நீங்கள்
பரமன் பாதம் இறக்கியே
பளுவின்றி சுகமாய் இளைப்பாறுவீர்
வேதனை நிறைந்த ஆன்மாவே
வெறுமையாய் நீயும் அமைந்திரு
சோதனை என்றே வந்தாலும்
சார்ந்திரு இறைவன் துணையிலே
"தொலைந்தது எனது வாழ்க்கை
தோல்வி நான்பல கண்டேன்" - என
கலைந்த நம்பிக்கையை மீட்டெடுக்கும்
கடவுளின் பாதம் சரணடைவீர்
வருந்திடும் உள்ளங்கள் யாவும்
வந்திட வேண்டும் இறைவனிடம்
பெருந்துணை அவரிடம் உண்டு
பெருந்துயர் எனினும் போக்கிடுவார்
பெருங்கடல் அடித்தளம் நடுங்கினாலும்
பேரிடி மின்னல் சூழ்ந்தாலும்
பெருங்குன்றும் நிலமும் அதிர்ந்தாலும்
பேணிக் காப்பவர் இறைவனே
கடலின் அலைகள் பொங்கினாலும்
கடும் வெள்ளம் பாய்ந்தாலும்
உடலின் வாதைஉறு தந்தாலும்
உரியவர் உற்றவேளை உதவிடுவார்
கவலை வேண்டாம் மனங்களே
காக்கும் இறைவன் காண்கின்றார்
குவலயம் நோக்கும் கடவுள் - உம்
குறைகளைத் தீர்க்க மாட்டாரோ?
கருத்துகள் இல்லை:
கருத்துரையிடுக